Një shoqatë austriake shëron falas 12 fëmijë kosovarë

Skenderaj, 28 janar - Shoqata humanitare nga Austria "Aleanca për fëmijët” ka nisur të enjten katër fëmijët e parë nga Kosova për shërim falas në Austri, ndërsa sipas koordinatorit të kësaj shoqate për Kosovën, dr. Naim Bardiqi, gjatë muajit shkurt për trajtim mjekësor në këtë shtet do të dërgohen edhe 8 fëmijë të tjerë.

"Deri më tani për shërim jashtë Kosovës, kryesisht në Austri, janë dërguar 34 fëmijë me të meta në zemër dhe çrregullime ortopedike, ndërsa për këtë vit do të dërgohen edhe 12 fëmijë, katër prej të cilëve do të nisën menjëherë, ndërsa 8 të tjerë gjatë muajit të ardhshëm”, tha Bardiqi.

Sipas tij, të gjitha shpenzimet për trajtim mjekësor madje dhe për operim në rast nevoje mbulohen nga shoqata, ndërsa pacientët shërbimet i marrin nga specialistët më të njohur austriakë në fushën e kardiologjisë dhe ortopedisë.

Bardiqi pohoi se në Austri kanë siguruar mbështetje edhe nga kardiologu gjakovar, Hajrullah Binakaj, i cili në ordinancën e vet "Zemra" në Gjakovë u ka mundësuar mjekëve austriakë t’i kontrollojnë fëmijët dhe në bazë të rezultateve, ta bëjnë edhe përzgjedhjen e atyre që dërgohen për shërim në Austri.

"Dr. Binakaj na ka lënë në dispozicion të gjitha pajisjet e nevojshme, krejtësisht falas", u shpreh doktori Bardiqi.

Katër fëmijët e parë për këtë vit që kanë siguruar trajtim shëndetësor falas në Austri janë: Sh.G nga Skenderaj, E.G. nga Kaçaniku, D.K. nga Prishtina dhe E.L nga Rahoveci.